Eingabe löschen

Kopfbereich

Schnellnavigation

Hauptnavigation

Istorgias da pleds

2021

1. plaz: respect
Respect è in pled ch’ins inscuntra savens er en connex cun la pandemia actuala. Tgi ha respect da tschellas u tschels e da lur ponderaziuns e quitads, tgi ha pauc u insumma nagin – exempels da tuttas sorts han ins pudì observar il davos avant la votaziun davart la lescha da Covid-19. I va per respectar opiniuns che divergeschan dals agens parairis, dal parairi persunal en favur u cunter la vaccinaziun, da l’egliada individuala sin restricziuns e mesiras. I va per tadlar avant che valitar, avant che sa basar sin ideas fatgas u recicladas. Il respect è ina valita essenziala colliada stretgamain cun la solidaritad e la coesiun, ina valur che po contribuir a la superaziun da la crisa. En quest senn po la tscherna dal pled rumantsch da l’onn 2021 era vegnir interpretada sco giavisch per dapli respect sco impurtanta resursa umana en in temp cumplitgà.

2. plaz: pazienza
Igl ha duvrà blera pazienza durant il 2021 ed i vala d’avair vinavant perseveranza e pazienza. Magari han ins d’avair pazienza cun insatgi. La pazienza va cun il temp a la fin ed ins perda ella. E betg sco ultim stat er il pled pazient en in ferm connex cun la pazienza. En quest senn cumbinescha il segund pled elegì da la giuria dal pled svizzer da l’onn 2021 il terzet da pleds tschernids per l’onn 2021: avair pazienza è er in mussament da respect, e betg mo las pazientas ed ils pazients dovran pazienza per superar lur malsogna, mabain era las persunas che lavuran en la tgira demussan di per di lur pazienza cun la situaziun actuala.

3. plaz: tgira
Il pled tgira è vegnì elegì sco term general che cuvra differents temas actuals l’onn 2021. La tgira sco terz pled rumantsch da quest onn na fa betg mo allusiun a l’Iniziativa da tgira ed als quitads che corona chaschuna als ospitals ed a la politica da sanadad en general. Il term manegia era la tgira da vart da la societad per la coesiun e per la democrazia. Duas valurs che la pandemia ha mess quest onn particularmain en il center dal discurs public. Ultra da la tematica da corona pledenta il pled tgira però er auters aspects ch’èn stads relevants l’onn scadent. Per exempel la tgira da la societad per l’acceptanza e la toleranza. Questa tenuta han las Svizras ed ils Svizzers confermà il 2021 per exempel cun la Lètg per tuts. Manegiada è en pli era la tgira dals dretgs umans, sch’ins pensa als fugitivs en situaziuns d’urgenza. E la finala è era manegiada la tgira per sasez en vista a l’augment da malsognas e disturbis psichics en consequenza da la pandemia.

2020

1. plaz: mascrina
Cun la furma diminutiva d’in pled reusseschi a las Rumantschas ed als Rumantschs da render pli charina e pli bella ina chaussa ch’è atgnamain insatge uschè grond ch’i cuvra la mesadad da nossa fatscha. E cun il pled “mascrina” differenziescha la lingua rumantscha cleramain la mascra da tschaiver u la mascra da cosmetica da quest object che tutga dapi quest onn da pandemia tar la gardaroba dad in e scadin. La mascrina devi gia avant il coronavirus, ma pir cun la pandemia actuala è ella s’etablida en l’entir mund. En la banca da datas linguisticas da la ZHAW cumpara la mascrina ensemen cun “obligatori”, “duvrar”, “butia” eav. Il pled è cumparì la primavaira 2020 cun l’erupziun da la pandemia en Svizra en connex cun la dumonda, schebain i gidia da purtar ina mascrina u betg. La tematica da la mascrina è restada actuala durant l’entir onn, e la fin finala èn las mascrinas schizunt daventadas obligatoricas en divers secturs.

2. plaz: extraordinari
Extraordinari è forsa il fatg che la giuria è sa decidida cun quest pled per in adjectiv en la retscha dals pleds da l’onn. Quai è l’emprima giada insumma ch’in adjectiv rumantsch survegn questa distincziun. Dentant è il 2020 stà en mintga cas in onn extraordinari. Igl ha dà sesidas extraordinarias, decisiuns extraordinarias e situaziuns extraordinarias. Ma cun s’adattar a las novas circumstanzas han ins era pudì far experientschas extraordinarias – quai tenor il proverbi tudestg: “Situaziuns extraordinarias pretendan mesiras extraordinarias.” Tgi avess pensà che scolastas e scolasts instrueschian lur scolaras e scolars gia l’onn 2020 sin distanza? E tgi avess siemià da star la stad 2020 sin ina muntogna sin 3’000 m s.m. enstagl insanua sper la mar? E tge experientscha extraordinaria avais Vus fatg durant il 2020?

3. plaz: positivitad
Quest pled ha duas varts. Ozendi n’èsi insumma betg bun, sch’ins fa in test da corona e quel è positiv. La rata da positivitad è memia auta. E tuttina èsi da restar positiv, sch’ins vul vegnir bain tras quest temp malsegir. L’expressiun “positivitad” n’ha betg fatg grondas undas en Rumantschia durant l’onn 2020. Pir a partir dal terz quartal – u cun il cumenzament da la segunda unda da la pandemia en Svizra – vegn scrit e discurrì savens da la positivitad. E quai bain savens en il senn negativ, pia en il connex cun la rata u la quota da positivitad.

2019

1. plaz: luf
Il luf è stà tar nus ditg mo pli in protagonist en paraulas. Pir ils onns 1990 è el puspè arrivà en noss mund real ed è restà. Enturn maisas radundas, en brevs da lecturs u a chaschun da debattas parlamentaras: il luf procura per discussiuns cuntraversas e sveglia emoziuns. El fascinescha ils ins e fa tema als auters. Betg il davos er en il chantun Grischun. El simbolisescha la natira che reconquista spazis pers ed el è ina spezia d'anarchist che smanatscha l'urden vertent. Vegni a dar in cumpromiss che conceda al luf in toc abitadi che cuntenta tant ils "romantichers urbans" sco ils "muntagnards testards"?

2. plaz: diaspora
Terra empermessa, Terra incognita, Terra negligida? Er il rumantsch ha sia diaspora – per ils ins lur dachasa, per ils auters in spazi che sveglia speranzas u irritaziuns. Tgi è da l'avis ch'i vegnia discutà memia bler e fatg pauc u nagut, tgi vesa nair basegn d'agir, tgi vul priorisar ils territoris tradiziunals, avant che sustegnair las Rumantschas ed ils Rumantschs giu la Bassa. In fatg è però: la gronda part dals umans che discurran rumantsch viva oz ordaifer l'intschess tradiziunal da la lingua.

3. plaz: unda verda
Glatschers che lieuan, inslas che sfundran – duas consequenzas ch'il midament dal clima ha per l'ambient, in dals temas dominants avant l'elecziun dal parlament federal da quest atun. In tema, cun il qual las partidas cun agendas ecologicas han pudì metter en moviment l'unda verda. Il resultat è enconuschent: ina victoria istorica per ils Verds. In u l'auter crap verd che vegn bittà en l'aua giu Berna vegn franc a far undas er en il Grischun, malgrà che las partidas che s'engaschan tradiziunalmain per l'ambient n'han gì nagin success tar nus.